თქვენ ხართ ახლა აქ;
თავფურცელი > ბოსტნეული > შემწვარი დამარინადებული წიწაკა იტალიურად

შემწვარი დამარინადებული წიწაკა იტალიურად

შემწვარი და შემდეგ ზეთში დამარინადებული წიწაკა იტალიური სამზარეულოს კლასიკაა და ძალიანაა გავრცელებული ხმელთაშუაზღვისპირა ქვეყნების კულინარიაში. შესაბამისად, რეცეპტიც მეტ-ნაკლებად განსხვავებულია. იტალიურ ვერსიაში წიწაკას ზეითუნის ზეთში დებენ ნიორთან, ორეგანოს ან ბაზილიკის ფოთლებთან ერთად. სავსებით შესაძლებელია ამ მცენარეების ხმელი სახით გამოყენებაც (ნივრის გარდა). ასეთი წიწაკა ხშირად გამოიყენება სალათებში, ბუტერბროდებსა და სხვადასხვა საუზმეულში. გასაკეთებლად ძალიან მარტივია და არც დიდ ძალისხმევას მოითხოვს.

2 ცალი წითელი წიწაკა (ყვითელიც შეიძლება)

4-5 ს.კ.ზეითუნის ზეთი

2 კბილი ნიორი

ორეგანო (ხმელი, რადგან აქ ნედლი არ იშოვება) ან ბაზილიკი

 

თავდაპირველად შევწვათ წიწაკა. ამის გაკეთება შეიძლება ღუმელში, 200 გრადუსზე, წიწაკა ხშირად გადავაბრუნოთ. კანი უნდა დაიბუშტოს და ადვილად სძვრებოდეს. უფრო მარტივი გზაა პირდაპირ გაზქურის ცეცხლზე შებრაწვა: დავიჭიროთ ყუნწით და დავდოთ ქურაზე, ღია ცეცხლზე. კანი რომ გაუშავდება, გადავაბრუნოთ და ასე გავაგრძელოთ სანამ ბოლომდე შეიწვება. შემწვარი წიწაკა ჩავდოთ ცივ წყალში და კანი გავაძროთ. ხელსახოცით შევამშრალოთ, ყუნწი და თესლი მოვაცილოთ და დავჭრათ ზოლებად.

მოვამზადოთ მარინადი: შევურიოთ ზეთი, ორეგანო და ნიორი. მოვასხათ წიწაკას და გამოყენებამდე მინიმუმ 2 საათი დავდგათ. პერიოდულად ამოვურიოთ. თუ უფრო დიდხანს გსურთ შენახვა, შეგიძლიათ მაცივარში შევინახოთ, გამოყენებამდე ცოტა ხნით ადრე კი გამოვიღოთ ოთახის ტემპერატურაზე.

 

კომენტარები

კომენტარი

Nino Jananashvili
ბლოგ რატატუის ავტორი და Ratatui Food & Media-ს თანადამფუძნებელი, ფრანგული ენის სპეციალისტი, ფუდბლოგინგისა და ფოტობლოგინგის ხანგრძლივი გამოცდილებით. ჰყავს მეუღლე და ორი ქალიშვილი. 2014 წლიდან ცხოვრობს ამერიკაში და ახლა უკვე ამერიკულ რეცეპტებსაც უზიარებს მკითხველს.
http://www.ratatui.me

Leave a Reply

Top